27 ಕ್ಷೇತ್ರದಲ್ಲಿ ಇಂದಿರಾ ಫೋಟೊ ನೋಡಿ ಒಟು ಹಾಕಿದ್ರು, ಅಷ್ಟು ಖ್ಯಾತಿ ಇತ್ತು – ಸಿದ್ದರಾಮಯ್ಯ

ಬೆಂಗಳೂರು: 1978ರಲ್ಲಿ ವಿಧಾನಸಭೆ ಚುನಾವಣೆ ಸಮಯದಲ್ಲಿ ನಾನು ಜನತಾ ಪಕ್ಷದಲ್ಲಿದ್ದಾಗ ಹಾರೋಹಳ್ಳಿ ಊರಿಗೆ ಮತ ಕೇಳಲು ಹೋದಾಗ ಪ್ರತಿ ದಲಿತರ ಮನೆಯಲ್ಲಿ ಇಂದಿರಾ ಗಾಂಧಿ ಅವರ ಫೋಟೋ ಇತ್ತು. ಕೇವಲ ಇಂದಿರಾ ಗಾಂಧಿ ಅವರ ಫೋಟೋ ತೋರಿಸಿ 27 ಕ್ಷೇತ್ರಗಲ್ಲಿ ಕಾಂಗ್ರೆಸ್ ಗೆದ್ದಿತ್ತು. ಇಂದಿರಾ ಅವರು ಅಷ್ಟು ಮಟ್ಟಿಗೆ ಖ್ಯಾತಿ ಪಡೆದಿದ್ದರು ಎಂದು ಕಾಂಗ್ರೆಸ್‌ ಶಾಸಕಾಂಗ ಪಕ್ಷದ ನಾಯಕ ಸಿದ್ದರಾಮಯ್ಯ ಹೇಳಿದರು.

ಇಂದಿರಾಗಾಂಧಿ ಹುತಾತ್ಮರಾದ ದಿನದ ಹಿನ್ನೆಲೆಯಲ್ಲಿ ಕೆಪಿಸಿಸಿ ಕಚೇರಿಯಲ್ಲಿ ಭಾನುವಾರ ನಡೆದ ಕಾರ್ಯಕ್ರಮದಲ್ಲಿ ಭಾಗಿಯಾಗಿ ಮಾತನಾಡಿದ ಅವರು, ಇಂದಿರಾಗಾಂಧಿ ಹಾಗೂ ಸರ್ದಾರ್ ಪಟೇಲ್ ಅವರ ಜನ್ಮದಿನ.ಕಾಕತಾಳೀಯವಾಗಿ ಎರಡು ಒಂದೇ ದಿನ. ಇಂದಿರಾ ಅವರನ್ನು ಉಕ್ಕಿನ ಮಹಿಳೆ ಎಂದರೆ, ಪಟೇಲರನ್ನು ಉಕ್ಕಿನ ಮನುಷ್ಯ ಎಂದು ಕರೆಯಲಾಗುತ್ತದೆ ಎಂದರು.

ಇಂದಿರಾ ಅವರು ಈ ದೇಶ ಕಂಡ ಅಪ್ರತಿಮ ನಾಯಕರು. 16 ವರ್ಷಗಳ ಕಾಲ ದೇಶದ ಪ್ರಧಾನಿಯಾಗಿ ದೇಶದ ಅಭಿವೃದ್ಧಿಗೆ ಅಪಾರ ಕೊಡುಗೆ ನೀಡಿದ್ದಾರೆ. ಬಾಲ್ಯದಿಂದ ಅಪಾರ ದೇಶ ಭಕ್ತಿ ಬೆಳೆಸಿಕೊಂಡಿದ್ದವರು. ಸ್ವಾತಂತ್ರ್ಯ ಹೋರಾಟಗಾರರ ಜತೆಯಲ್ಲೇ ಬೆಳೆದಿದ್ದರು. ದೇಶದ ಪ್ರಧಾನಿಯಾಗಿ ಅವರು ಕಾಂಗ್ರೆಸ್ ಪಕ್ಷದಲ್ಲಿ ಬಹಳ ವಿರೋಧ ಎದುರಿಸಿದರು. ಕಾಂಗ್ರೆಸ್ ಇಬ್ಬಾಗ ಆದಾಗ ನಿಜಲಿಂಗಪ್ಪ ಅವರು ಸಿಂಡಿಕೇಟ್ ಭಾಗದ ನಾಯಕರಾದರೆ, ಇಂದಿರಾ ಅವರು ಇಂಡಿಕೆಟ್ ನಾಯಕರಾದರು. ನಂತರ ಇಂದಿರಾ ಅವರು ಪಕ್ಷ ಕಟ್ಟಿದ ರೀತಿ, ದೇಶ ಮುನ್ನಡೆಸಿದ ರೀತಿ ಸ್ಮರಿಸಬೇಕಾದದ್ದು.

ದೇಶದಲ್ಲಿನ ಬಡತನ ನಿರ್ಮೂಲನೆಗೆ ಇಚ್ಛಾಶಕ್ತಿ ಇಟ್ಟು. ದೇಶದಲ್ಲಿ ಅಸಮಾನತೆ ಶತಮಾನಗಳಿಂದ ಬೆಳೆದು ಬಂದಿತ್ತು. ಸಾಮಾಜಿಕ ಹಾಗೂ ಆರ್ಥಿಕವಾಗಿ ಇದ್ದ ಅಸಮಾನತೆ ಹೋಗಲಾಡಿಸಲು 20 ಅಂಶಗಳ ಕಾರ್ಯಕ್ರಮ ರೂಪಿಸಿದರು. ಬಡವರಿಗಾಗಿ, ರೈತರಿಗೆ, ಮಹಿಳೆಯರಿಗಾಗಿ, ಅನೇಕ ಕಾರ್ಯಕ್ರಮ ಕೊಟ್ಟರು. ಭೂ ಸುಧಾರಣಾ ಕಾಯ್ದೆ ತಂದು, ರಾಜಧನ ರದ್ದು, ಬ್ಯಾಂಕ್ ರಾಷ್ಟೀಕರಣ ಮಾಡಿದರು. ಶ್ರೀಮಂತರು ಮಾತ್ರ ಬ್ಯಾಂಕ್ ಖಾತೆ, ಸಾಲ, ಠೇವಣಿ ಅವಕಾಶ ಇತ್ತು. ರಾಷ್ಟ್ರೀಕರಣದಿಂದ ಬ್ಯಾಂಕ್ ಸೌಲಭ್ಯ ಕಟ್ಟೆ ಕಡೆಯ ವ್ಯಕ್ತಿಗೂ ಸಿಗುವಂತೆ ಮಾಡಿದರು. ಇದೆಲ್ಲದರಿಂದ ಜನ ಅವರನ್ನು ದೇವತೆಯಂತೆ ಕಾಣುತ್ತಿದ್ದರು ಎಂದು ನೆನಪಿಸಿಕೊಂಡರು.

ಬಾಂಗ್ಲಾ ವಿಮೋಚನೆ ಆಗುವಾಗ ಇಂದಿರಾ ಗಾಂಧಿ ಅವರು ಕಾರಣ. ಆಗ ವಾಜಪೇಯಿ ಅವರು ವಿರೋಧ ಪಕ್ಷದ ನಾಯಕರಾಗಿದ್ದರು ಅವರನ್ನು ದುರ್ಗೆ ಎಂದಿದ್ದರು. ಹೀಗಾಗಿ ಅವರನ್ನು ಉಕ್ಕಿನ ಮಹಿಳೆ ಎಂದು ಕರೆಯುತ್ತಾರೆ.ದೇಶಕ್ಕಾಗಿ ಪ್ರಾಣ ತ್ಯಾಗ ಮಾಡಿದರು. ನೆಹರೂ ಅವರ ಕುಟುಂಬ ದೇಶಕ್ಕಾಗಿ ಪ್ರಾಣ ತ್ಯಾಗ ಮಾಡಿದೆ. ಸೋನಿಯಾ ಗಾಂಧಿ ಅವರು ಪ್ರಧಾನ ಮಂತ್ರಿ ಆಗುವ ಅವಕಾಶ ಸಿಕ್ಕರೂ ದೇಶಕ್ಕಾಗಿ ಮನಮೋಹನ್ ಸಿಂಗ್ ಅವರನ್ನು ಪ್ರಧಾನಿ ಮಾಡಿದರು. ದೇಶದ ಬಗ್ಗೆ ಬದ್ಧತೆ ಇದ್ದರೆ ಮಾತ್ರ ಇದು ಸಾಧ್ಯ.

ಇಂದಿರಾಗಾಂಧಿ ಹಾಗೂ ಸರ್ದಾರ್ ಪಟೇಲರ ಆದರ್ಶ ಪಾಲಿಸಿಕೊಂಡು ಮುಂದುವರಿಸಿಕೊಂಡು ಹೋಗಬೇಕು.ಪಟೇಲರು ಸ್ವಾತಂತ್ರ್ಯ ಹೋರಾಟದಲ್ಲಿ ತಮ್ಮನ್ನು ತಾವು ಸಂಪೂರ್ಣವಾಗಿ ಅರ್ಪಿಸಿಕೊಂಡವರು. ರೈತ ಕುಟುಂಬ ದಿಂದ ಬಂದ ಅವರು ಕಾನೂನು ಓದಿ ಗಾಂಧೀಜಿ ಅವರಿಂದ ಪ್ರಭಾವಿತರಾಗಿ ಸ್ವಾತಂತ್ರ್ಯ ಹೋರಾಟಕ್ಕೆ ಧುಮುಕಿದರು.

ತಮ್ಮ ಪತ್ನಿ ಕಾಲವಾದಾಗಲೂ ವಿಚಲಿತರಾಗದೆ, ತಮ್ಮ ಕೆಲಸ ಮುಗಿಸಿ ನಂತರ ಹೋಗುತ್ತಾರೆ. ಅಷ್ಟರ ಮಟ್ಟಿಗೆ ಕರ್ತವ್ಯ ನಿಷ್ಠೆ ಹಾಗೂ ದೇಶ ನಿಷ್ಠೆ ಇತ್ತು. ಭಾರತದಲ್ಲಿ 500ಕ್ಕೂ ಹೆಚ್ಚು ಸಂಸ್ಥಾನ ಇವೆ. ಅವು ವಿಭಜನೆ ಆಗುತ್ತವೆ ಎಂದು ಬ್ರಿಟೀಷರು ಭಾವಿಸಿದರು. ಆದರೆ ಈ ಎಲ್ಲ ಸಂಸ್ಥಾನಗಳನ್ನು ಒಗ್ಗೂಡಿಸಿದ ರೀತಿ ಅವಿಸ್ಮರಣೀಯ. ಅದು ಸಾಮಾನ್ಯ ನಾಯಕರಿಂದ ಸಾಧ್ಯವಿಲ್ಲ. ಭಾರತ ಒಂದು ರಾಷ್ಟ್ರವಾಗಿ ಒಗ್ಗೂಡಿಸುವಲ್ಲಿ ಅವರ ಪಾತ್ರ ಅಪಾರ.

ಅವರು ಹೆಚ್ಚು ದಿನ ಉಳಿಯಲಿಲ್ಲ. ಆದರೂ ಇವರ ವಿಚಾರದಲ್ಲಿ ಬಿಜೆಪಿ ರಾಜಕೀಯ ಮಾಡುತ್ತಿದೆ. ಪಟೇಲರನ್ನು ಕಡೆಗಣಿಸಿದರು ಅಂಬೇಡ್ಕರ್ ಅವರನ್ನು ಸೋಲಿಸಿದರು ಎಂದೆಲ್ಲಾ ಸುಳ್ಳು ಹೇಳುತ್ತಿದ್ದಾರೆ. ಸ್ವಾತಂತ್ರ್ಯ ಬಂದಾಗ ಮೋದಿ ಹುಟ್ಟೇ ಇರಲಿಲ್ಲ. ಅವರಿಗೆ ದೇಶಭಕ್ತಿ ಗೊತ್ತಿಲ್ಲ, ತ್ಯಾಗ ಬಲಿದಾನ ಮಾಡಿಲ್ಲ. ಈಗ ದೇಶ ರಕ್ಷಿಸುತ್ತೇವೆ ಎಂದು ಡೋಂಗಿ ಬಿಡುತ್ತಿದ್ದಾರೆ. ಕಾಂಗ್ರೆಸ್ ನವರು ತಮ್ಮ ಆಸ್ತಿ ಪಾಸ್ತಿ, ಪ್ರಾಣ ತ್ಯಾಗ ಮಾಡಿದ್ದಾರೆ. ಇದು ಕಾಂಗ್ರೆಸ್ ಹಾಗೂ ಬಿಜೆಪಿ ನಡುವಣ ವ್ಯತ್ಯಾಸ. ಸ್ವಾತಂತ್ರ್ಯ ತರಲು, ದೇಶ ಕಟ್ಟಲು ಕಾಂಗ್ರೆಸ್ ಕೊಡುಗೆ ಅಪಾರ.

ಮೋದಿ ಅವರು ಈಗ ದೇಶಕ್ಕಾಗಿ ಕಾಂಗ್ರೆಸ್ ಕೊಡುಗೆ ಏನು ಎಂದು ಕೇಳುತ್ತಾರೆ. ದೇಶದಲ್ಲಿ ವಿದ್ಯುತಿಕರಣ, ದೂರವಾಣಿ ಸಂಪರ್ಕ ಕೊಟ್ಟಿದ್ದು ರಾಜೀವ್ ಗಾಂಧಿ. ನೆಹರು, ಪಟೇಲರು, ಅಂಬೇಡ್ಕರ್, ಇಂದಿರಾಗಾಂಧಿ, ರಾಜೀವ್ ಗಾಂಧಿ, ಈ ನಾಯಕರು ನಡೆದ ದಾರಿಯಲ್ಲಿ ನಡೆಯಲು ಪ್ರಯತ್ನಿಸಿದರೆ ಸಾಕು ದೇಶಕ್ಕೆ ಸ್ವಲ್ಪವಾದರೂ ಸೇವೆ ಮಾಡಿದಂತಾಗುತ್ತದೆ ಎಂದು ಟಾಂಗ್ ಕೊಟ್ಟರು.

Latest Indian news

Popular Stories

error: Content is protected !!