“ಸುಳ್ಳು ಸುದ್ದಿಗಳ ಸವಾಲನ್ನು ಪರಿಹರಿಸಲು” ಕೇಂದ್ರವು ಪತ್ರಿಕಾ ಮಾಹಿತಿ ಬ್ಯೂರೋ ಅಡಿಯಲ್ಲಿನ ಸತ್ಯ ಪರಿಶೀಲನಾ ಘಟಕಕ್ಕೆ ಸೂಚನೆ ನೀಡಿದ ಮರುದಿನ, ಸುಪ್ರೀಂ ಕೋರ್ಟ್ ಇಂದು ಅಧಿಸೂಚನೆಗೆ ತಡೆಯಾಜ್ಞೆ ನೀಡಿದೆ.
ಭಾರತದ ಮುಖ್ಯ ನ್ಯಾಯಮೂರ್ತಿ ಡಿವೈ ಚಂದ್ರಚೂಡ್, ನ್ಯಾಯಮೂರ್ತಿ ಜೆಬಿ ಪರ್ದಿವಾಲಾ ಮತ್ತು ನ್ಯಾಯಮೂರ್ತಿ ಮನೋಜ್ ಮಿಶ್ರಾ ಅವರ ಪೀಠವು ಈ ವಿಷಯವು ಅಭಿವ್ಯಕ್ತಿ ಸ್ವಾತಂತ್ರ್ಯಕ್ಕೆ ಸಂಬಂಧಿಸಿದ್ದಾಗಿದೆ ಎಂದು ಹೇಳಿದೆ. ಆದರೆ ನ್ಯಾಯಾಲಯವು ಪ್ರಕರಣದ ಅರ್ಹತೆಯ ಬಗ್ಗೆ ಯಾವುದೇ ಪ್ರತಿಕ್ರಿಯೆ ನೀಡಲಿಲ್ಲ.
ಸ್ಟ್ಯಾಂಡ್-ಅಪ್ ಕಾಮಿಕ್ ಕುನಾಲ್ ಕಮ್ರಾ ಮತ್ತು ಎಡಿಟರ್ಸ್ ಗಿಲ್ಡ್ ಆಫ್ ಇಂಡಿಯಾ ಬಾಂಬೆ ಹೈಕೋರ್ಟಿನ ಮೊರೆ ಹೋಗಿದ್ದು, ಫ್ಯಾಕ್ಟ್ ಚೆಕ್ ಯುನಿಟ್ ನಿರ್ಬಂಧಿಸಲು ನಿರ್ದೇಶನವನ್ನು ಕೋರಿ ನ್ಯಾಯಾಲಯ ಮೆಟ್ಟಿಲೇರಿದ್ದರು.
ಕಳೆದ ವರ್ಷ ಕೇಂದ್ರವು ತಂದ ಮಾಹಿತಿ ತಂತ್ರಜ್ಞಾನ (ಮಧ್ಯವರ್ತಿ ಮಾರ್ಗಸೂಚಿಗಳು ಮತ್ತು ಡಿಜಿಟಲ್ ಮಾಧ್ಯಮ ನೀತಿ ಸಂಹಿತೆ) ನಿಯಮಗಳು, 2021 ರ ತಿದ್ದುಪಡಿಗಳ ಭಾಗವಾಗಿ ಫ್ಯಾಕ್ಟ್ ಚೆಕ್ ಘಟಕ ಸ್ಥಾಪಿತವಾಗಿತ್ತು.
ನಿಯಮಗಳ ಅಡಿಯಲ್ಲಿ, ಈ ಘಟಕವು ನಕಲಿ, ಸುಳ್ಳು ಮತ್ತು ಸರ್ಕಾರದ ವ್ಯವಹಾರದ ಬಗ್ಗೆ ತಪ್ಪುದಾರಿಗೆಳೆಯುವ ಸಂಗತಿಗಳನ್ನು ಒಳಗೊಂಡಿರುವ ಯಾವುದೇ ಪೋಸ್ಟ್‌ಗಳನ್ನು ಕಂಡರೆ ಅಥವಾ ತಿಳಿಸಿದರೆ, ಅದು ಅವುಗಳನ್ನು ಸಾಮಾಜಿಕ ಮಾಧ್ಯಮ ಮಧ್ಯವರ್ತಿಗಳಿಗೆ ಫ್ಲ್ಯಾಗ್ ಮಾಡುತ್ತದೆ. ಅಂತಹ ಪೋಸ್ಟ್ ಅನ್ನು ಫ್ಲ್ಯಾಗ್ ಮಾಡಿದ ನಂತರ, ಮಧ್ಯವರ್ತಿಯು ಅದನ್ನು ತೆಗೆದುಹಾಕುವ ಅಥವಾ ಹಕ್ಕು ನಿರಾಕರಣೆ ಹಾಕುವ ಆಯ್ಕೆಯನ್ನು ಹೊಂದಿರುತ್ತಾನೆ. ಕ್ರಮಕೈಗೊಳ್ಳದಿದ್ದಲ್ಲಿ ಮಧ್ಯವರ್ತಿಯು ಕಾನೂನು ಕ್ರಮದ ಅಪಾಯವಿತ್ತು. ಸರಕಾರ ಭಿನ್ನ ಧ್ವನಿಯನ್ನು ನಿಗ್ರಹಿಸಲು ಈ “ಫ್ಯಾಕ್ಟ್ ಚೆಕ್” ಯುನಿಟ್ ಬಳಸಿಕೊಳ್ಳಲಾಗುತ್ತದೆ ಎಂಬ ಆರೋಪ ಕೇಳಿ ಬಂದಿತ್ತು.
