Featured StorySports

ಟೆಸ್ಟ್ ಕ್ರಿಕೆಟ್: ಭಾರತದ ಗೆಲುವಿನ ಆಸೆಗೆ ತಣ್ಣೀರೆರಚಿದ ಮಳೆ; ಪಂದ್ಯ ಡ್ರಾದಲ್ಲಿ ಅಂತ್ಯ

ನಾಟಿಂಗ್‌ಹ್ಯಾಮ್‌: ಐದು ಪಂದ್ಯಗಳ ಟೆಸ್ಟ್‌ ಸರಣಿಯಲ್ಲಿ ಟೀಮ್ ಇಂಡಿಯಾಗೆ ಆತಿಥೇಯ ಇಂಗ್ಲೆಂಡ್‌ ಎದುರು 1-0 ಅಂತರದ ಮುನ್ನಡೆ ಗಳಿಸುವ ಅದ್ಭುತ ಅವಕಾಶ ಇತ್ತಾದರೂ, ಪಂದ್ಯದ ಐದನೇ ಮತ್ತು ಅಂತಿಮ ದಿನ ಎಡೆ ಬಿಡದೆ ಸುರಿದ ಮಳೆಯಿಂದಾಗಿ ಒಂದು ಎಸೆತವನ್ನೂ ಕಾಣಲು ಸಾಧ್ಯವಾಗದೆ ಡ್ರಾ ಫಲಿತಾಂಶ ಹೊರಬಿದ್ದಿದೆ.

ಪಂದ್ಯದ ನಾಲ್ಕನೇ ದಿನ ಇಂಗ್ಲೆಂಡ್ ತಂಡವನ್ನು ಎರಡನೇ ಇನಿಂಗ್ಸ್‌ನಲ್ಲಿ 303 ರನ್‌ಗಳಿಗೆ ಆಲ್‌ಔಟ್‌ ಮಾಡಿದ ಭಾರತ ತಂಡ 209 ರನ್‌ಗಳ ಸವಾಲಿನ ಗುರಿ ಪಡೆದುಕೊಂಡಿತು. ದಿನದಂತ್ಯಕ್ಕೆ ತನ್ನ ಎರಡನೇ ಇನಿಂಗ್ಸ್‌ ಆರಂಭಿಸಿ ಕೆಎಲ್‌ ರಾಹಲ್ (26) ವಿಕೆಟ್‌ ಕಳೆದುಕೊಂಡರು 52 ರನ್‌ ಗಳಿಸಿ ಸುಸ್ಥಿತಿಯಲ್ಲಿದೆ. ಕೊನೇ ದಿನ ಕೈಲಿರುವ 9 ವಿಕೆಟ್‌ಗಳಿಂದ 157 ರನ್‌ಗಳನ್ನು ಗಳಿಸುವ ಅಗತ್ಯವಿದೆ.
ಎರಡನೇ ಇನಿಂಗ್ಸ್‌ನಲ್ಲಿ ಅದ್ಭುತ ಆಟವಾಡಿದ್ದ ಕೆಎಲ್‌ ರಾಹುಲ್, 38 ಎಸೆತಗಳಲ್ಲಿ 6 ಫೋರ್‌ಗಳೊಂದಿಗೆ 26 ರನ್‌ ಗಳಿಸಿದ್ದರು. ಆದರೆ, ಸ್ಟುವರ್ಟ್‌ ಬ್ರಾಡ್‌ ಎಸೆತದಲ್ಲಿ ವಿಕೆಟ್‌ ಕೈಚೆಲ್ಲಿ ನಿರಾಶೆ ಅನುಭವಿಸಿದರು. ಮತ್ತೊಂದೆಡೆ ರೋಹಿತ್‌ ಶರ್ಮಾ (ಅಜೇಯ 12) ಕ್ರೀಸ್‌ನಲ್ಲಿ ಭದ್ರವಾಗಿ ನಿಂತಿರುವುದು ಟೀಮ್ ಇಂಡಿಯಾದ ಆತ್ಮವಿಶ್ವಾಸ ಹೆಚ್ಚಿಸಿತ್ತು. ಆದರೆ ಎಲ್ಲದಕ್ಕೂ ವರುಣ ತಣ್ಣೀರೆರಚಿದ್ದಾನೆ.

ಮೊಹಮ್ಮದ್ ಸಿರಾಜ್‌ ಬಗ್ಗೆ ದೊಡ್ಡ ಹೇಳಿಕೆ ಕೊಟ್ಟ ಬ್ರಾಡ್‌ ಹಾಗ್!

ಮಳೆಯಾಟ ಆಗಾಗ ಶುರುವಾಗಿ ಮಧ್ಯ ನಿಂತರೂ ಕೂಡ ಪಂದ್ಯ ಆರಂಭಿಸಲು ಸಾಧ್ಯವಾಗಲಿಲ್ಲ. ಚಹಾ ವಿರಾಮದ ಹೊತ್ತಿಗೆ ಮಳೆ ನಿಂತರೂ ಆಟ ಆರಂಭಿಸಲು ಸಾಧ್ಯವಾಗಲಿಲ್ಲ. ಭಾರತ ತಂಡಕ್ಕೆ ಕನಿಷ್ಠ 120 ಎಸೆತಗಳಾದರೂ ಸಿಗಲಿ ಟಿ20 ಮಾದರಿಯಲ್ಲಾದರೂ ಗೆಲುವಿಗೆ ಪ್ರಯತ್ನಿಸಲಿ ಎಂದು ಅಭಿಮಾನಿಗಳು ಎದುರು ನೋಡುತ್ತಿದ್ದರು. ಆದರೆ, ಆಟ ಶುರುಮಾಡಲು ಸಾಧ್ಯವಾಗದೆ ಡ್ರಾ ಫಲಿತಾಂಶ ಘೋಷಿಸಲಾಯಿತು.

ಸರಣಿಯ ಎರಡನೇ ಪಂದ್ಯ ಕ್ರಿಕೆಟ್‌ ಕಾಶಿ ಎಂದೇ ಖ್ಯಾತಿ ಪಡೆದಿರುವ ಲಾರ್ಡ್ಸ್‌ ಕ್ರೀಡಾಂಗಣದಲ್ಲಿ ಆಗಸ್ಟ್‌ 12 ರಂದು ಆರಂಭವಾಗಲಿದೆ. ಟೀಮ್ ಇಂಡಿಯಾ ಮೊದಲ ಪಂದ್ಯದಲ್ಲಿ ಸಿಕ್ಕ ಇನಿಂಗ್ಸ್‌ ಮುನ್ನಡೆಯ ವಿಶ್ವಾಸದೊಂದಿಗೆ ಎರಡನೇ ಟೆಸ್ಟ್‌ನಲ್ಲೂ ಗೆಲ್ಲುವ ಫೇವರಿಟ್‌ ತಂಡವಾಗಿ ಕಣಕ್ಕಿಳಿಯಲಿದೆ.

ನಾಟಿಂಗ್‌ಹ್ಯಾಮ್‌ ಟೆಸ್ಟ್‌ ಪಂದ್ಯದ ಸಂಕ್ಷಿಪ್ತ ಸ್ಕೋರ್‌

ಇಂಗ್ಲೆಂಡ್‌: ಮೊದಲ ಇನಿಂಗ್ಸ್‌ 65.4 ಓವರ್‌ಗಳಲ್ಲಿ 183ಕ್ಕೆ ಆಲ್‌ಔಟ್‌ (ಡಾಮ್‌ ಸಿಬ್ಲೀ 18, ಜಾಕ್‌ ಕ್ರಾವ್ಲೀ 27, ಜೋ ರೂಟ್‌ 64, ಜಾನಿ ಬೈರ್‌ಸ್ಟೋವ್‌ 29, ಸ್ಯಾಮ್‌ ಕರ್ರನ್ 27*; ಜಸ್‌ಪ್ರೀತ್‌ ಬುಮ್ರಾ 46ಕ್ಕೆ 4, ಮೊಹಮ್ಮದ್ ಶಮಿ 28ಕ್ಕೆ 3, ಶಾರ್ದುಲ್ ಠಾಕೂರ್‌ 41ಕ್ಕೆ 2, ಮೊಹಮ್ಮದ್‌ ಸಿರಾಜ್ 48ಕ್ಕೆ 1).


ಭಾರತ: ಮೊದಲ ಇನಿಂಗ್ಸ್‌ 84.5 ಓವರ್‌ಗಳಲ್ಲಿ 278 ಆಲ್‌ಔಟ್‌ (ರೋಹಿತ್‌ ಶರ್ಮಾ 36, ಕೆಎಲ್‌ ರಾಹುಲ್ 86, ಆರ್‌ ಜಡೇಜಾ 56, ಜಸ್‌ಪ್ರೀತ್‌ ಬುಮ್ರಾ 28; ಜೇಮ್ಸ್‌ ಆಂಡರ್ಸನ್ 54ಕ್ಕೆ 4, ಓಲ್ಲೀ ರಾಬಿನ್ಸನ್‌ 85ಕ್ಕೆ 5).
ಇಂಗ್ಲೆಂಡ್: ಎರಡನೇ ಇನಿಂಗ್ಸ್‌ 85.5 ಓವರ್‌ಗಳಲ್ಲಿ 303 ರನ್‌ಗೆ ಆಲ್‌ಔಟ್‌ (ಡಾಮ್‌ ಸಿಬ್ಲೀ 28, ಜೋ ರೂಟ್ 109, ಜಾನಿ ಬೈರ್‌ಸ್ಟೋವ್ 30, ಡ್ಯಾನ್‌ ಲಾರೆನ್ಸ್‌ 25, ಸ್ಯಾಮ್‌ ಕರ್ರನ್ 32; ಜಸ್‌ಪ್ರೀತ್‌ ಬುಮ್ರಾ 54ಕ್ಕೆ 5, ಶಾರ್ದುಲ್ ಠಾಕೂರ್‌ 37ಕ್ಕೆ 2, ಮೊಹಮ್ಮದ್ ಸಿರಾಜ್ 84ಕ್ಕೆ 2).
ಭಾರತ: ಎರಡನೇ ಇನಿಂಗ್ಸ್‌ 14 ಓವರ್‌ಗಳಲ್ಲಿ 1 ವಿಕೆಟ್‌ಗೆ 52 ರನ್ (ಕೆಎಲ್ ರಾಹುಲ್ 26; ಸ್ಟುವರ್ಟ್‌ ಬ್ರಾಡ್ 18ಕ್ಕೆ 1).
(ನಾಲ್ಕನೇ ದಿನದಾಟದ ಅಂತ್ಯಕ್ಕೆ)

ನಿಮ್ಮದೊಂದು ಉತ್ತರ

ನಿಮ್ಮ ಮಿಂಚೆ ವಿಳಾಸ ಎಲ್ಲೂ ಪ್ರಕಟವಾಗುವುದಿಲ್ಲ. ಅತ್ಯಗತ್ಯ ವಿವರಗಳನ್ನು * ಎಂದು ಗುರುತಿಸಲಾಗಿದೆ

Back to top button