ಉಡುಪಿ, ಡಿ.22: ಮಲ್ಪೆ ಮೀನುಗಾರಿಕಾ ಬಂದರಿನಿಂದ 26 ನಾಟಿಕಲ್ ಮೈಲು ದೂರದಲ್ಲಿ ಆಳಸಮುದ್ರದಲ್ಲಿ ಮೀನುಗಾರಿಕೆ ನಡೆಸುತ್ತಿದ್ದ ಕಡೇಕಾರು ರಕ್ಷಾ ಎಂಬವರ ಮಾಲಕತ್ವದ ಶ್ರೀ ನಾರಾಯಣ – II ಹೆಸರಿನ ಮೀನುಗಾರಿಕಾ ಬೋಟ್ ಡಿ.19ರಂದು ಮಲ್ಪೆ ಬಂದರಿನಿಂದ ಪ್ರಯಾಣ ಬೆಳೆಸಿತ್ತು. ಇದೀಗ ಬೋಟ್ ಸಮುದ್ರದಲ್ಲಿ ಮುಳಗಿದೆ.
ಬೋಟಿನ ಒಳಗೆ ನೀರು ಪ್ರವೇಶಿಸಲು ಆರಂಭಿಸಿದ ತಕ್ಷಣ ಶ್ರೀ ನಾರಾಯಣ – II ರ ತಾಂಡೇಲಾ ಅವರು ತಕ್ಷಣ ಹತ್ತಿರದ ಮೀನುಗಾರಿಕಾ ದೋಣಿಯ ಸಹಾಯ ಪಡೆದು ಜೀವ ಉಳಿಸಿಕೊಂಡಿದ್ದಾರೆ.
ಶ್ರೀ ಮೂಕಾಂಬಿಕಾ ಅನುಗ್ರಹದ ಬೋಟಿನ ಕಾರ್ಮಿಕರು ಕ್ಷಿಪ್ರವಾಗಿ ಪ್ರತಿಕ್ರಿಯಿಸಿ ಮುಳುಗುತ್ತಿರುವ ಬೋಟನ್ನು ಉಳಿಸಲು ಪ್ರಯತ್ನಿಸಿದರು. ದುರದೃಷ್ಟವಶಾತ್, ಅವರ ಪ್ರಯತ್ನಗಳು ವಿಫಲವಾಗಿ ಬೆಳಿಗ್ಗೆ 8 ರ ಹೊತ್ತಿಗೆ ದೋಣಿ ಸಂಪೂರ್ಣವಾಗಿ ಮುಳುಗಿತು.
ಮುಳುಗಿದ ದೋಣಿಯಲ್ಲಿದ್ದ ಎಲ್ಲಾ ಎಂಟು ಮೀನುಗಾರರನ್ನು ಶ್ರೀ ಮೂಕಾಂಬಿಕಾ ಅನುಗ್ರಹದ ಸಿಬ್ಬಂದಿ ಯಶಸ್ವಿಯಾಗಿ ರಕ್ಷಿಸಿದರು. ರಕ್ಷಿಸಲಾದ ಮೀನುಗಾರರನ್ನು ಸುರಕ್ಷಿತವಾಗಿ ದಡಕ್ಕೆ ಸಾಗಿಸಲಾಯಿತು. ಈ ಅಹಿತಕರ ಘಟನೆಯಿಂದ ಅಂದಾಜು 18 ಲಕ್ಷ ರೂಪಾಯಿ ನಷ್ಟವಾಗಿದೆ.
